محەمەد خورشید: ڕاووڕووت و کوشتنی هاووڵاتیان لە کەرکووک بووەتە دیاردەی ڕۆژانە

لەرێکەوتى : February 18, 2018, 6:35 pm

avatar

محەمەد خورشید: ڕاووڕووت و کوشتنی هاووڵاتیان لە کەرکووک بووەتە دیاردەی ڕۆژانە
کەرکووک -KDP.info- د. محەمەد خورشید، بەرپرسی لقی سێی پارتی لە كەركووك ڕایگەیاند، كوشتن و ڕفاندن و ڕاووڕووت لە كەركووك لە حاڵەتەوە بووەتە دیاردەی ڕۆژانە و دەشڵێ، چەكداران بەكۆمەڵ هەڵدەكوتنە سەر ماڵی هاووڵاتیان.

د. محەمەد خورشید، بەرپرسی لقی سێی پارتی لە كەركووك بە ماڵپەڕی فەرمیی پارتی دیموكراتی كوردستانی ڕاگەیاند: "لە كەركووك بە هۆی ئاڵۆزیی ڕەوشی ئەمنییەوە، هەڵكوتانە سەر ماڵان و كوشتن و ڕفاندنی هاووڵاتیان لە حاڵەتەوە بووەتە دیاردە و لە كەركووك ڕۆژانە خەڵك دەڕفێندرێن، ڕفاندنەكەش هەموو نەتەوەكانی گرتووەتەوە، بەتایبەتی كورد، بەگشتی دوای ڕووداوەكانی ١٦ی ئۆكتۆبەر دزی و ڕاووڕووت و خەڵكڕفاندن و ئازادكردنیان بەرامبەر بە پارە زۆر بووە."

دوای ڕووداوەكانی داگیركردنی ناوچە كوردستانییەكانی دەرەوەی ئیدارەی حكوومەتی هەرێمی كوردستان، بە هۆی دەسەڵاتی میلیشیاكانی حەشد و هێزە عێراقییەكانەوە مەترسی بۆ سەر هاووڵاتیان بەگشتی و كورد بەتایبەت پەیدا بووە، هەر ئەوەش وای كردووە بەشێكی زۆری دانیشتوانی ناوچە داگیركراوەكان ناتوانن بگەڕێنەوە شوێنی خۆیان.

د. محەمەد خورشید ئاماژەی بۆ ئەوە كرد: "ڕۆژانە دیاردەی چوونە سەرماڵی هاووڵاتیان بە چەكەوە ڕووی لە هەڵكشانە، دەچنە سەر ماڵی هاووڵاتیان و تەقەیان لێ دەكەن، بەتایبەتی ئەو گەڕەكانەی زیاتر كوردیان تێدا نیشتەجێیە، بەگشتی تەقەكردن و كوشتن زۆر زیادی كردووە، بۆ نموونە، هەر دوێنێ ئێوارە كەسێكیان كوشتووە بە ناوی سەمیر نازم، كە كارمەندی بەڕێوەبەرایەتیی ئاسایشی پارتیمان بووە."

چاپ